Merħba għal Ars Moriendi
Merħba għal Ars Moriendi Waqt id-dħul ħalli mument biex tħoss l-ambjent ta’ madwarek. Dan hu post tad-dfin – kripta li fiha nżammu ġenerazzjonijiet sħaħ ta’ stejjer. Għal sekli, f’Malta, bħal f’pajjiżi oħra Ewropej, in-nies kienu jiġu midfuna taħt il-knejjes parrokkjali tagħhom, u hekk jibqgħu qrib il-komunitajiet li kienu jagħmlu parti minnhom. Dawn l-ispazji saru aktar minn imkejjen ta’ mistrieħ; saru postijiet ta’ memorja. Hawnhekk qegħdin jistrieħu l-Mostin. Nistiednukom tesploraw dan l-ispazju bl-istess sentiment li jintwera lejn xi ħadd li kontu tħobbu. Filwaqt li din l-esperjenza tiżvolġi fost l-oqbra, verament din mhix dwar il-mewt. Hi dwar il-ħajja – u dwar l-uniku element li naqsmu flimkien: iż-żmien. F’din l-ewwel waqfa, arloġġ tar-ramel jimmarka l-passaġġ tal-ħin. Kull farka ramel li tinżel, bla ħoss, tfakkarna f’kull mument li jgħaddi u ma jerġax jiġi. Ars Moriendi tfisser L-Arti ta’ Kif Tmut Sewwa. Għalkemm darba din kienet gwida ta’ kif tiffaċċja l-mewt fil-paċi, din issa qed tistedinna biex nistaqsu mistoqsija differenti: Kif irridu ngħixu, filwaqt li nafu li ż-żmien huwa limitat? Ġorr miegħek din il-mistoqsija filwaqt li tkompli lejn il-pass li jmiss. DIREZZJONI: Ikser fuq ix-xellug u segwi r-rotta lejn il-Penitent.
|

